1 ... managa wesun jainar; þaruh qemun jah daupidai wesun. ni nauhþanuh galagiþs was in karkarai Iohannes. 2 þatuh þan qiþands aiwaggelista ataugida, ei so garehsns bi ina neƕa andja was þairh Herodes birunain. 3 akei faur þata, at bajoþum daupjandam jah ainƕaþarammeh seina anafilhandam daupein, miþ sis misso sik undrunnun sumai, ni kunnandans, ƕaþar skuldedi maiza. 4 þaþroh þan warþ sokeins us siponjam Iohannes miþ Iudaium bi swiknein. 5 in þizei ju jah leikis hraineino inmaidiþs was sidus jah so bi guþ hrainei anabudana was, ni þanaseiþs judaiwiskom ufarranneinim jah sinteinom daupeinim brukjan usdaudjaina, ak Iohanne hausjandans þamma faurrinnandin aiwaggeljon. 6 wasuh þan jah frauja þo ahmeinon anafilhands daupein, eiþan garaihtaba warþ bi swiknein sokeins gawagida. 7 unte witoþ þize unfaurweisane missadede ainaizos witoþ raidida, azgon kalbons gabrannidaizos utana bibaurgeinais; afaruh þan þo in wato wairpandans hrain jah hwssopon jah wullai raudai ufartrusnjandans, swaswe gadob, þans ufarmiton munandans. 8 iþ Iohannes idreigos daupein merida jah missadede aflet þaim ainfalþaba gawandjandam gahaihait; iþ frauja at afleta frawaurhte jah fragift weihis ahmins jah fragibands im þatei sunjus þiudangardjos wairþaina. 9 swaei sijai daupeins Iohannes ana midumai twaddje ligandei, ufarþeihandei raihtis witodis hrainein, iþ minnizei filaus aiwaggeljons daupeinai; inuh þis bairhtaba uns laiseiþ qiþands: aþþan ik in watin izwis daupja, iþ sa afar mis gagganda swinþoza mis ist, þizei ik ni im wairþs ei anahneiwands andbindau skaudaraip skohis is; sah þan izwis daupeiþ in ahmin weihamma. 10 bi garehsnai nu ...
1 So nu faheþs meina usfullnoda. jains skal wahsjan, iþ ik minznan. 2 eiþan nu siponjam seinaim, þaim bi swiknein du Judaium sokjandam jah qiþandam sis: rabbei, saei was miþ þus hindar Jaurdanau, þammei þu weitwodides, sai sa daupeiþ, jah allai gaggand du imma — nauh unkunnandans þo bi nasjand; inuh þis laiseiþ ins qiþands: jains skal wahsjan, iþ ik minznan. 3 aþþan so bi ina garehsns du leitilamma mela raihtis bruks was jah fauramanwjandei saiwalos þize daupidane fralailot aiwaggeljons mereinai: iþ fraujins laiseins anastodjandei af Iudaia jah and allana midjungard gaþaih, and ƕarjano þeihandei und hita nu, jah aukandei, all manne du gudis kunþja tiuhandei. 4 inuh þis jah skeirs wisandei. 5 mikilduþ fraujins wulþaus kannida qiþands: sa iupaþro qimands ufaro allaim ist. 6 ni þatei ufaro wisandan sware kannidedi, ak jah swalauda is mikilduþais maht insok jah himinakundana jah iupaþro qumanana qiþands, iþ sik airþakundana jah us airþai rodjandan, in þizei wistai manna was: jaþþe weihs jaþþe praufetus wisands jag-garaihtein weitwodjands, akei us airþai was jah us waurdahai wistai rodjands. 7 iþ sa us himina qumana, jabai in leika wisan þuhta, akei ufaro allaim ist, jah þatei gasaƕ jag-gahausida þata weitwodeiþ, jah þo weitwodida is ni ainshun nimiþ. 8 jah þauhjabai us himina ana airþai in manne garehsnais qam, akei ni þe haldis airþeins was nih us airþai rodjands, ak himinakunda anafilhands fulhsnja þoei gasaƕ jag-gahausida at attin. 9 þo nu insakana wesun fram Iohanne ni in þis þatainei, ei fraujins mikilein gakannidedi, ak du gatarhjan jah gasakan þo afgudon haifst Sabailliaus jah Markailliaus, þaiei ainana anananþidedun qiþan attan jah sunu. 10 iþ anþar sa weiha ...
1 ... ainshun uslagida ana ina handuns, at weihai auk is mahtai unanasiuniba unselein ize nauh disskaidandein jah ni uslaubjandein faur mel sik gahaban. 2 galiþun þan þai andbahtos du þaim auhumistam gudjam jah Fareisaium. þaruh qeþun du im jaijainai: duƕe ni attauhuþ ina? andhofun þan þai andbahtos qiþandans: þatei ni ƕanhun aiw rodida manna swaswe sa manna. 3 soh þan andahafts du gasahtai, maizuh þan du afdomeinai jainaize ungalaubeinai warþ. 4 andhofun auk jainaim anahaitandam im, in þizei ni attauhun ina, ni andsitandans jainaize unselein, þize anahaitandane im, ak mais sildaleikjandans fraujins laisein swikunþaba in allaim alamannam faurawisan rahnidedun. 5 iþ jainai in unseleins seinaizos balþein ize ni usþulandans miþ hatiza andhofun wiþra ins qiþandans: ibai jah jus afairzidai siuþ? Sai, jau ainshun þize reike galaubidedi imma aiþþau þize Fareisaie, alja so managei, þaiei ni kunnun witoþ, fraqiþanai sind. 6 þoh þan miþ baitreins þwairheins rodidedun, in þammei liugandans bigitanda, ei ni ainshun reike aiþþau Fareisaie galaubidedi imma, at Neikaudaimau bi garehsnai gudis qimandin at imma in naht jah miþ balþein faur sunja insakandin jah qiþandin im: ibai witoþ unsar stojiþ mannan ... 7 ... at jainaim qiþandam þatei ni ainshun þize reike jah Fareisaiei galaubida, ni fraþjandans þatei sa raihtis Fareisaius was jah ragineis Judaie jah ains reike ustaikniþs us þaim fraqiþanam was galaubjands fraujin, du gasahtai jainaize unseleins faur ina rodjands. 8 iþ eis ni usþulandans þo gasaht andhofun qiþandans: ibai jah þu us Galeilaia is? Ussokei jah saiƕ þatei ...